Det er travle veker hos oss i Kampflyprogrammet (skal snart fortelje meir om kvifor), så me rekk ikkje å oppdatere blogg og Twitter så ofte som me skulle ønskje – men det betyr ikkje at det ikkje skjer mykje viktig som me kan blogge om, tvert i mot. I ein liten pause mellom slaga vil eg tipse om to nyhende frå den siste veka – ei frå den fremtidige «norske» F-35-basen Luke Air Force Base i ørkenen i Arizona, og frå USS Wasp og Marine Fighter Wing 121 utanfor kysten av USA.
«Change of Mission» for 56th Fighter Wing på Luke Air Force Base
56th Fighter Wing er den avdelinga dei norske flya og dei norske flygarane skal bli del av, og denne veka vart F-35 formelt ein del av deira «mission statement» noko dei i god amerikansk stil feira med ein «Change of Mission ceremony.» Dei har og hatt fleire andre store F-35-milepælar dei siste vekene, mellom anna gjennomførte Australia første «partner-flyging» frå basen, og første treningsklasse for F-35-flygarar byrja utdanninga si.
USMC byrjar «OT-1» med F-35 på USS Wasp
Det amerikanske marineinfanteriet (USMC) skal etter planen nå det ein kallar «initial operating capability» (IOC) med F-35 i sommer, men før det skal dei gjennomføre ein første runde med «Operational Testing.» I den første testrunden kjend som «OT-1» skal seks F-35B frå 121. og 501. skvadron i USMC, utstyrt med den nyaste 2B-programvara, operere frå USS Wasp frå 18. til 29. mai. Her skal dei ikkje lenger drive tekniske testar, men sjå korleis flyet vil fungere i vanleg operativ drift om bord. Eg snakka med min kollega i det fleirnasjonale programmet, Joe DellaVedova, tidlegare denne veka etter at han var komen heim frå eit besøk til Wasp, og han var imponert over det han hadde sett. Det er stor skilnad samanligna med dei tekniske testane han hadde sett før, sa han. Her var det av med silkehanskane for å bekrefte at ein kan drive flya slik ein har planlagt, og at dei andre systema og våpna om bord fungerer saman med F-35.
Meir kjem snart – følg med på Twitter!